Scottish social housing charter: Gaelic translation

Cothrom air taigheadas is taic

7, 8 agus 9: Roghainnean taigheadais

Bidh uachdarain shòisealta ag obair còmhla airson dèanamh cinnteach:

gum faigh daoine a tha a' coimhead airson dachaigh fiosrachadh a chuidicheas iad le bhith a' dèanamh roghainnean is cho-dhùnaidhean fiosrach a thaobh nan roghainnean taigheadais a th' aca

gun urrainn do luchd-gabhail agus daoine air liostaichean taigheadais breithneachadh a dhèanamh air na roghainnean taigheadais aca.

Tha dleastanas air uachdarain shòisealta a thaobh a bhith a' cur stad air suidheachaidhean far a bheil daoine gun dachaigh agus bu chòir dhaibh dèanamh cinnteach:

gum faigh daoine, a tha ann an cunnart an dachaigh aca a chall, comhairle is fiosrachadh air na ghabhas dèanamh gus stad a chur air sin.

Tha na builean seo a' gabhail a-steach nan dleastanasan a th' air uachdarain gus fiosrachadh a thoirt do dhaoine a tha a' coimhead airson dachaigh agus gus comhairle a thoirt dhan fheadhainn a tha an cunnart a bhith gun dachaigh feuch an tèid stad air suidheachaidhean, cho tràth 's as urrainnear, far am faod daoine a bhith gun dachaigh. Mar phàirt dhe seo, dh'fhaodadh gun dèanar 'sgrùdaidhean fallaineachd' a thaobh taigheadais do luchd-gabhail agus daoine air liostaichean taigheadais gus an cuideachadh le bhith a' beachdachadh air na roghainnean aca ann an roinn an taigheadais shòisealta no ann an roinn eile.

10: Cothrom air taigheadas sòisealta

Nì uachdarain shòisealta cinnteach:

gum bi e furasta do dhaoine a tha a' coimhead airson dachaigh cur a-steach airson an taghaidh as fharsainge de thaigheadas sòisealta a tha ri fhaotainn agus gum faigh iad am fiosrachadh a tha dhìth orra a thaobh mar a bhios uachdarain a' toirt seachad dhachaighean agus air cho buailteach 's a tha e gum faigh iad dachaigh.

Tha a' bhuil seo a' gabhail a-steach nas urrainn do dh'uachdarain shòisealta a dhèanamh airson a dhèanamh furasta do dhaoine cur a-steach airson an taghaidh as fharsainge de thaigheadas sòisealta a tha ri fhaotainn, agus a tha freagarrach agus tha iomchaidh airson nam feumalachdan aca. Tha e a' gabhail a-steach ghnìomhan as urrainn do dh'uachdarain shòisealta a dhèanamh leotha fhèin agus ann an co-bhuinn ri càch, mar eisimpleir, tro Chlàran Taigheadais Coitcheann no co-sgeamaichean iomlaid, no tro sgeamaichean fiosrachaidh is comhairleachaidh ionadail.

11: A' cumail a' dol le gabhaltas

Nì uachdarain shòisealta cinnteach:

gum faigh luchd-gabhail am fiosrachadh a tha dhìth orra a thaobh mar a gheibh iad taic gus fuireach san taigh aca; agus nì iad cinnteach gu bheil taic fhreagarrach ann, leithid sheirbheisean a bheir an t-uachdaran fhèin seachad agus an fheadhainn a bheir buidhnean eile seachad.

Tha a' bhuil seo a' gabhail a-steach mar as urrainn do dh'uachdarain, air an ceann fhèin no ann an co-bhuinn ri buidhnean eile, luchd-gabhail a chuideachadh a dh'fhaodadh a bhith feumach air taic gus cumail a' dol leis a' ghabhaltas aca. Am measg nan daoine sin, dh'fhaodadh luchd-gabhail a bhith ann a tha ann an cunnart a bhith air dheireadh leis a' mhàl aca, agus luchd-gabhail a tha feumach air atharraichean air an dachaigh aca gus am bi e freagarrach airson na h-aoise aca, ciorram no euslaint a th' orra no dhleastanasan cùraim.

12: Daoine gun dachaigh

Bidh Comhairlean a' coileanadh nan dleastanasan aca a thaobh dhaoine gun dachaigh:

gus am faigh daoine a tha gun dachaigh, no a tha ann an cunnart a bhith gun dachaigh, cuideachadh, comhairle is fiosrachadh gu sgiobalta agus gu furasta; gus am faigh iad àite-fuirich sealach no èiginn a tha freagarrach agus math nuair a tha sin a dhìth; agus gus am faigh iad taic le bhith a' faighinn agus a' cumail dachaigh mar a bu chòir a bhith aca.

Tha a' bhuil seo a' mìneachadh nan rudan a bu chòir do chomhairlean a dhèanamh agus iad a' coileanadh nan dleastanasan reachdail aca do dhaoine a tha gun dachaigh no ann an cunnart a bhith gun dachaigh. Bu chòir do dh'uachdarain shòisealta ceumannan a stèidheachadh gus stad a chur air suidheachaidhean far am bi daoine gun dachaigh aig ìre cho tràth 's as urrainn.