Scots Government Commitments tae Gaelic an Scots an Scots Langages Bill: consultation

Consultation on Scots Government Commitments tae Gaelic an Scots an Scots Langages Bill.

Bòrd na Gàidhlig

This pairt wull discuss the commitment for tae gae ower the functions an structures o Bòrd na Gàidhlig for tae mak siccar thit Scotland haes a effective leadership group an netwirk o organisations for the heezin up o Gaelic.

Bòrd na Gàidhlig wis stertit unner the Gaelic Langage (Scotland) Act 2005. The Scots Government is noo wantin for tae gae ower Bòrd na Gàidhlig for tae mak siccar thit Scotland haes the maist effective leadership group pit in steid for Gaelic wi the maist appropriate pooers for the heezin up o Gaelic. The review wull hae speirin thochts o stakehauders as pairt o this consultation an wull include wirkin alangsides Bòrd na Gàidhlig for tae tak on their thochts aboot opportunities they see for system improvement. Wi regaird for the pairts o this consultation on Gaelic Medium Education an splorin a Gàidhealtachd hit wull be necessar tae for tae refleck on whither or no thochts thit cam oot fae repones tae thae pairts wull gar mair chyges tae the functions o Bòrd na Gàidhlig.

The Scots Government an Bòrd na Gàidhlig gie support tae a braid netwirk o groups thit wirk in support o Gaelic an thocht wull be gien tae hou best tae gie this support maist eidently an effectively. Oor ettle for Gaelic taks in the contributions fae public authorities an groups an especially oor weish is thit groups wi functions in airts, tourism an in heritage think aboot whit wey they kin pit their haun in for tae get a heicher rate o progress for Gaelic. The owerluikin wull luik at the structure, function an operation o Bòrd na Gàidhlig the noo an at the netwirks o fundit Gaelic groups wi a luik tae speirin whither or no this is stull the richt form for tae best promote an support Gaelic athin Scotland.

A bridth o thochts hae been gied vyce on this subjeck an the like is thit this is a misure o hou important tae the community hit is for tae hae a national group for tae heeze up the leid. Ance mair thir thochts are pyntit oot here for tae gar reflectin an discussin. Hou an iver stakehauders maunna feel fankit tae thir topics an are walcomit as pairt o this consultation for tae gie a hail reenge o thochts an their suggestions o onie system chynges thit they are wantin for tae see.

For ensampul, thocht haes been gien on a want for tae rebrand an flit Bòrd na Gàidhlig; on the amoont o Bòrd na Gàidhlig fundin o Gaelic groups; on the wirkins o the Gaelic langage plans system includin hits implementation; on the status an content o the documents Bòrd na Gàidhlig mak includin the National Plan for Gaelic an the Statutory Guidance on Gaelic Langage Plans. Some Gaelic spikkers an lairners see the key leadership role Bòrd na Gàidhlig hae in heezin the Gaelic langage an community confidence in the leid. Ithers ettle at Bòrd na Gàidhlig's role in seein thit ither public bodies are mair aware o an impactfu for Gaelic an in supportin Gaelic fundit groups athort the sector.

Thochts hae been gien anent whither or no Bòrd na Gàidhlig maun be coothier tae the Scots Government, an at the sel same time thit it maun be coothier wi the community an wi Gaelic groups. There been thochts gien anent regulation an enforcement, an aboot the corporate an administrative weicht on a wee'r public body an hou this micht be taen in haun or alleviatit.

There a kennin thit the ither Scots Government commitments micht hae effeck on the structure an wirkins o Bòrd na Gàidhlig but maistly there a acceptance thit gien Bòrd na Gàidhlig wis stertit ower seiventeen year syne thit hit's timeous for tae gae ower hou hit is wirkin an wirk oot whither or no thae wirkins thit hit wis stertit wi in 2005 is stull the anes thit Gaelic wants the noo.

A pickle o thaim giein a repone micht gie their thochts on the fine wirkins o the Bòrd na Gàidhlig functions giein their ain experience o whit weys they wirk in practice. Ithers micht want for tae refleck an talk aboot the structure o the group includin whaur aboots hit is steidit in the public body launscape.

Speirins anent hou Gaelic plans want for tae be regulatit an owerseen hae cam up in informal consultations tae, an kennin repones tae thon micht weil get pitten forret whan splorin a Gàidhealtachd we wad walcome ocht regairdin hou the Gaelic Plans System kin get amendit for tae mak stranger quicker progress for Gaelic.

Bòrd na Gàidhlig Functions

Bòrd na Gàidhlig haes as hits foondin legislation the Gaelic Langage (Scotland) Act 2005. Tae, hit haes a Framewirk Document thit pits oot hits relationship wi Government thegither wi ilkane's roles an responsibilities.

The ordinar functions o Bòrd na Gàidhlig, as pitten oot in the 2005 Act, kin be taen as bein tae dae wi the Gaelic leid, Gaelic scuilin, an Gaelic culture. Bòrd na Gàidhlig hae duties for tae heeze up an for tae facilitate the heezin up o the uiss an unnerstaunin o the leid. Bòrd na Gàidhlig haes functions for tae gie cooncil on langage, scuillin, an culture tae Scots Ministers an ither public groups. Mair, Bòrd na Gàidhlig haes the pooer for tae cooncil, whan speirt tae, ither fowk on maitters tae dae wi the Gaelic leid, Gaelic scuillin, an Gaelic culture.

Bòrd na Gàidhlig is responsinle tae for duties regairdin Gaelic plans an for the makkin o the National Plan for Gaelic. The Bòrd kin haud public authorities for tae pit thegither a Gaelic Langage Plan pittin oot whit a gien group maun dae wi regairds tae Gaelic, kin come tae a greeance on the feck o the plan wi them, an speir for reports on progress o hou hit is gettin implementit. Bòrd na Gàidhlig maun pit thegither Guidance on Gaelic langage plans an on Gaelic scuillin. A guid wheen o the fundin pitten ower tae Bòrd na Gàidhlig is daelt oot bi therisels throu grants fae them tae ither groups an projecks thit tak tae dae wi the support o the Gaelic leid.

The 2005 Act hauds thit the functions gien ower tae Bòrd na Gàidhlig maun be uisit wi the heidin o makkin siccar Gaelic is a official leid o Scotland garrin equal respek tae the Inglis leid throu heezin the nummer o thaim thit kin uise an unnerstaun the Gaelic leid.

Status as an Executive Non-Departmental Public Body

Bòrd na Gàidhlig is a Non-Departmental Public Body. NDPBs pley a gey important role in the delivery o public services athin Scotland, cairryin oot a braid reenge o functions on the behauf o Government, wi differin levels o operational authority fae the Government.

NDPBs cairry oot ministers' priorities throu the promotion, fundin, regulation an scrutiny o services as weil as giein independent, expert advice tae ministers, an aften strategic policy inpit tae Government.

NDPBs maun add value tae Government throu their specialist knawledge an skills, their focus on specific maitters an connections wi stakehauders an ither interests. They are, bi naiture, delivery focusit an line their wirk wi the Government's Purpose an National Ootcomes.

As tae structure, Bòrd na Gàidhlig cuid sit closer tae Government an there gates for tae tak thit kin be considerit for hou this cuid be duin. There cuid be sauffins for tae be haed fae legal, human resoorces, finance an corporate support. This cuid relieve a wheen o the administrative weichts on a wee'r group.

Yit Bòrd na Gàidhlig rins as a wee'r public group alooin hit tae as muckle as they kin wirk throu the medium o Gaelic. We expeck thit there braid support in the principal o haein a public group for tae support an heeze up the Gaelic leid an thit hit is gey important thit this group gang forret wirkin in the Gaelic leid.

Gaelic Language Plans

The Scots Government wad like for tae hear yer thochts on whither or no the Gaelic langage plannin framewirk steys the best wey for tae cairry forret for the protection o the Gaelic langage or whither wider chyges is wantit as the ootcome o this luikin ower. The system the noo o Gaelic langage plans haes shawit progress, but there a chance here for tae think aboot whither or no this system kin be strengthent or whither there a better wey o gaun aboot awthin thit is gaun tae mak mair an quicker progress for Gaelic. Gif ye hae experience wi the Gaelic langage plannin framewirk we wad ask thit ye consider whither or no hit is as efficient as hit cuid be, or whither ye hae ocht for tae pit forret on hou tae mak a less resoorce intensive wey o makkin progress for Gaelic.

Consultation Speirins

Repones in consultation are socht on the speirin anent a luik ower at the structure an functionins o the Bòrd na Gàidhlig.

Dae ye hae onie thochts anent the duties o the Bòrd na Gàidhlig as they staun the noo an onie suggestions aboot hou they cuid wirk mair effective or efficient?

Dae ye hae onie thochts anent structural chynges at the Bòrd na Gàidhlig thit cuid strenthen the promotion o an the support for Gaelic in Scotland?

Is there ocht else thit ye wad like tae share anent the review o the functions an structure o the Bòrd na Gàidhlig thit ettles at makkin siccar Scotland haes the maist effective leadership group an netwirks o groups for the promotion o Gaelic?



Back to top